Plantun de Prouvènço

Pèr coumpara dos planto d'encò nostre

Euphorbia peplus & Juniperus phoenicea subsp. phoenicea

Euphorbia peplus

Euphorbiaceae

Nom en français : Euphorbe des jardiniers.

Descripcioun :
Aquesto lachusclo, que trachis proche dis oustau, es uno planto proun ramificado pas forço grando (20 cm). Li fueio soun óuvalo e primo e se recounèis peréu à si glando qu'an de bano loungarudo. Lou boursèu porto d'alo.

Usanço :
Coume tóuti lis meno d'Euphorbia, la lachusclo-di-jardin es uno planto empouisounanto. Lou la que s'escoulo à la coupo èi di proun irritant pèr la pèu, lis iue e la bouco. Pamens, poudès vous n'en servi pèr crema li berrugo ; un cop pèr jour, vint jour de tèms (L.). Ei bon peréu pèr sougna li mouchourlo de fedo e de chivau. Lis ancian tuavon li pèis de ribiero emé d'éufòrbi gachado (M.).

Port : Erbo
Taio : Pancaro entresigna
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Euphorbia
Famiho : Euphorbiaceae

Ordre : Malpighiales

Coulour de la flour : Verdo
Petalo : ges
Ø (o loungour) flour : Pancaro entresigna
Flourido : Printèms - Estiéu - Autouno - Ivèr

Sòu : Ca
Autour basso e auto : 0 à 1200 m
Aparado : Noun

Liò : Champ - Escoumbre e proche dis oustau - Camin
Estànci : Termoumediterran à Mountagnard
Couroulougi : Pancaro entresigna
Ref. sc. : Euphorbia peplus L., 1753

Mourven

Juniperus phoenicea subsp. phoenicea

Cupressaceae

Àutri noum : Cade-dourmihous, Morven, Mourvenc, Mourvè.

Nom en français : Genévrier rouge.

Descripcioun :
Lou mourven se rescontre souvènti-fes en bouissoun, mai pau veni autant grand qu'un aubrihoun (3 m), e alor sèmblo un pau à un auciprès emé si fueio coume d'escaumo (aleva encò di jouine). Li fru soun jaune, à rouge coulour de brico, à maturita. Coumpara emé la subsp. turbinata que trachis dins li duno en ribo de mar.

Usanço :
Mens couneigu que soun cousin lou cade, lou mourven èi vertuous contro li mau d'estoumac e de vèntre (cagagno). L'òli de mourven èi bono contro li tavan e li microbe.